Taarifa zilizopatikana kutoka Tanzania kupitia mwakilishi wa mapadre wa
Mbeya nchini Italia Mh. Padre Kristofa Zulu Nyoni ni kwamba, mwili wa Marehemu Padre
JAMES MBWAMA uliwasili salama jijini Dar es salaam, Tanzania tarehe 23/5/2012
muda wa saa 9.30 Alasiri, na kupokelewa na Askofu Gervas Nyaisonga wa Dodoma,
Askofu Maluma wa Njombe, na Pd. Magala Vicar General wa Jimbo la Mbeya
aliyeambatana na baadhi ya mapadre wa jimbo hilo. Kulikuwa pia na ujumbe wa
mapadre wanaofanyakazi katika Baraza la Maaskofu Katoliki Tanzania ambao
waliongozwa na Katibu wa Baraza la Maaskofu Katoliki Tanzania. Mh. Padre
Makunde. Mama Mkuu wa Shirika la Masista - Jimbo la Mbeya, Mheshimiwa sana Sr.
Mirambo aliambatana na Masista kutoka Konventi ya Makoka - Dar es Salaam na
Masista wanaofanya kazi Baraza la Maaskofu Katoliki Tanzania. Shughuli hiyo ya
kupokea mwili wa mpendwa wetu ilihudhuriwa pia na waamini walei na watu wenye
mapenzi mema kutoka kada mbalimbali.
Baada yakupokelewa mwili huo, Askofu Gervas Nyaisonga aliongoza Sala
fupi pale pale Uwanja wa ndege wa kimataifa wa Mwalimu Nyerere – Dar es Salaam,
na baada ya Sala hiyo na Baraka msafara ulianza safari kuelekea Mbeya kwa
mazishi ya Mheshimiwa Padre James Mbwama ambayo yanatarajiwa kufanyika siku ya
alhamisi tarehe 24/5/2012.
Wakati huo huo, habari kutoka jimboni Mbeya zinasema, Waamini, Masista na
Mapadre wa Jimbo la Mbeya wamefanya Sala maalum ya Mkesha kwa ajili ya
kumwombea Marehemu Padre James Mbwama usiku wa kuamkia alhamisi ya tarehe 24/5/2012.
Jimbo la Mbeya linaendelea kutoa shukrani zake za dhati kwa jumuiya
nzima ya watanzania Roma kwa ushirikiano waliouonesha tangu pale walipopata
taarifa za kuugua ghafla na hatimaye kufariki kwa Padre James Mbwama.
No comments:
Post a Comment